（節錄）林日曦至今只打過一份工，在商台待了八年。○三年尾、輟學一年後，朋友介紹他去商台網站工作。○四年，商台籌備網上論壇，林日曦忙了好幾個月，推出後聽眾熱烈留言；網絡世界當然有讚有彈、也有謾罵，十幾日就被管理層下令關閉。「上司同我講要停，我成晚都瞓唔着，唔知點解咁在意。可能擺咗好多心機落去，加上覺得依個係電台未來應該行的方向。網就係咁㗎嘛。但當時大家仲有傳統包袱，認為主持人唔應該俾你咁樣攻擊。」翌日他晨早八點返公司，那時他的座位剛好在俞琤房門口。「我知道佢都早返，一見佢返嚟我就同佢講，我係咩部門嘅邊個，我覺得個 forum唔停得。」俞琤掃他一眼，叫他入房，然後自己篤手機；林日曦愣在旁不知所措，看着俞琤打了幾個電話，「 Multi-media有個同事叫阿 Roy，佢話個網站唔停得喎，你上來傾傾。」沒多久，全部商台高層來到，「佢哋都覺得我好怪㗎喇，死𡃁仔，做咩事啫？其實繞過自己上司去講，係唔恰當。但我知道啲上司唔會同俞琤講。」惟有硬着頭皮講出理據。高層們各自表述意見，俞琤總結，「咁啦，不如會員制，令留言的人負責任啲，準備好先再開番啦。阿 Roy你滿唔滿意？」那刻他當然見好就收，「竟然走得甩。」
林日曦一張撲克臉，任何人見到都會認為他不可一世。「覺得啱，咪講囉。當然講時要有禮貌。但唔好同我講咩你食鹽多過我食米，唔好同我講經驗，要講道理。啱就係啱，無話你有經驗就啱啲。」討厭恃老賣老，但真有料到的前輩，他很尊重。訪問中他不只一次提到俞琤的身教，「佢唔只 ban你橋，佢會真係同你度，然後佢第二日返嚟又度咗啲新嘢，再 ban番自己尋日嗰啲，嗰種唔放棄、一定要度到最好的精神，對我影響好大。」○七年起林日曦開始發表填詞作品，至今近百首；林夕在他初入行時也常提點他，「我最欣賞是他的毅力。出街那份歌詞多數都係自己唔鍾意的，因為多數都係俾人彈鐘後的第二、三、四稿嚟。但第一稿你已傾盡所有精華落去，要改，總帶住晦氣怨氣去改，通常寫得唔好。但林夕可以寫到第八稿，都繼續追求再寫得好啲。」
在天比高他是年輕人的前輩，小心翼翼不想成為老屎忽。「天比高在天水圍，係間製作公司，又係社區中心。接外間嘅 job，俾有志創作的年輕人邊做邊學，而作品真係會出街。」五年間他做到創作總監，「但作為 mentor，自己覺得唔稱職。因為創作就係你用自己的方法去做，我 share唔到任何經驗俾佢哋，經驗即係包袱，係廢嘅，我不如做好自己先啦，我都需要邊做邊學。」二○一一年他辭職，全力做《黑紙》。
他的生活也好古墓派，辦潮流雜誌卻害怕上網，覺得資訊疲勞；不交際應酬，平時不在公司就在家。家也要靜，這些年住過西貢、粉嶺、元朗村屋，現在住小欖一個小島上，要花十幾分鐘行一道堤壩才出到黃金海岸；家中謝絕探訪，因為有潔癖。近幾年每日要交報紙專欄，他每朝清早五點起身寫作。討厭人遲到，自己也不會遲。他認為要自由，先要自律。公司盡量少規矩，「一有制度即係唔人性化，我哋想盡量逐個逐個人睇。呢位同事自律嘅，咪多啲自由，唔使理佢返唔返公司、遲唔遲到；有啲人分內事都無做到，咁就要過問多啲。」請病假也不用交醫生紙，「佢唔覺得公司係地獄，咪唔使詐病囉？我哋都未做到，但會嘗試改變。」他與另外兩位老闆都年過三十，「好老喇，要多啲俾後生同事搞。年輕人可能睇得少過你，但佢睇得啱過你。可能佢睇得窄過你，但佢睇得集中同埋透徹過你。我覺得唔需要 train佢哋嘅，佢哋 train返我轉頭啦。」
撰文：林茵
攝影：鄭樹清
（節錄自1292期《壹周刊》非常人語 林日曦 毛孩子）
（圖左起：編輯部豬欣、我、編輯部Johnathan Deep及編輯部孫Dragon，大家為應攝影師要求扮傾大茶飯，實際講緊同事是非）
沒有留言:
張貼留言