撞橋撞車撞鬼你咩《衝鋒車》

（少許劇透)

首先要多謝麒麟兄弟於百忙之中招待看電影及吃晚飯。不過下次請早點開始「逗Sonia笑」及「抱抱」情節，咪鬼等到在地鐡月台分別時才使出渾身解數，令人耳𨠫未盡，好鬼黑心。

合拍但百分二百港產電影《衝鋒車》由揸開筆改揸導演筒的劉浩良執導，靚佬吳鎮宇任達華鄭浩南譚耀文加古巨基主演。由於港産，所以我用廣東話寫這篇文。

故仔講一班賊佬假扮差佬想去打刧一架黑金藏於屍首內的跨境運屍車，點狠知同一班更惡的賊佬撞橋，然後一番埋身肉搏。中途殺出的程咬金包括一個有制服情意結但卻因為一己任務是臥底小巴司機的緣故而不能夠堂堂正正穿制服的真差佬。

電影中不斷出現相同的命題，旨在論說「穿什麼衣服不要緊，重要的是本質是美善的。咁，就夠曬」。咩著假差佬衫既真漢子，咩假小巴司機既真警察，咩臭的酸菜，咩心肝脾肺腎俾人拎走晒的先人遺體，咩用十六座紅色小巴改裝的假衝鋒車一全部都係指涉同一個意念。

冇錯劇本對白很抵死，金句連連。但係車！咁咪即係《無間道》？賊佬想做好人，要搵返身份認同。賊佬扮差佬扮到去捉賊好on居咩？劉德華直頭想同過去一刀兩斷，做個永遠的好人。唉，編劇都撞橋⋯

一様還一樣，話說回來呢，《衝鋒車》的劇本寫得很細致，荒旦得來合邏輯，笑位像日本的煙花表演，引得笑聲一朵朵連連爆發。

我最鐘意扮盲炳的鄭浩南。鄭浩南喎，同彭丹拍床戲的鄭浩南喎，點解咁有喜劇功架既呢？戴副大眼鏡，本來都忘記他是性感型男，但去到電影中間有一幕他沒有戴老花眼鏡在吃雪糕，我便又想起彭丹了。題外話，請我看電影的花樣男子應該唔知我係諗起彭丹的。成日話我做乜諗野，咁，我，係諗依啲野既。 

古巨基個形像係一百分正義年青好差人，但古sir講野太慢，舞台劇般唸的對白像蟻咬，聽得人很不耐煩。在尾聲他又做番卧底小巴司機講粗口先至感覺聚財。

黎緊五月勁抽既《全力扣殺》又係講放監賊佬尋找人生新身份的故事。咁咪又撞橋？看來身份 identity ，是香港人世世代代永刦回歸的茫茫焦慮。